男人視汽車為老婆，咁女人呢？揀車又會唔會好似揀老公咁，愛同一類型？《王老虎搶親》入面飾演夢露嘅陳美詩（Macy），開出誰人殺蛟龍為父報仇就委身下嫁嘅條件，咁樣搵老公咁兒戲？現實中嘅Macy唔兒戲但就心多，就算買部車都諗過度過，心繫大隻男Jeep款，又想有穩重男格局房車跟出跟入，諗諗吓又話可愛Kcar都不俗。似乎花心啲喎！
記者：許維雅
攝影：林栢鈞
Hair:SunnyYu@HairCulture
愛粗獷型
唔做訪問翻查資料都差啲唔記得Macy係女子組合女生宿舍嘅成員，眨眼五年嘅娛樂圈掙扎開始為大家帶來印象，好似喺《王老虎搶親》入面戲份唔算多，但樣子甜美嘅Macy都令人容易記得佢係王老虎第一個搶嘅老婆。老公唔可以亂咁嫁，現實中嘅Macy又係咪鍾意王老虎呢類型呢？「我覺得王老虎好正o架！我特別鍾意啲身手靈敏、運動型嘅男人，佢心地好，性格又單純，係衝動咗啲啫。我覺得好Man嘅男人先有型，有少少粗獷味最好。」講到車，Macy嘅「舊愛」係四驅款嘅HARRIER，口中經常提住最鍾意嘅都係LandRover同Hummer等Jeep款，每每提到更會雙眼發光猛讚：「好型吖嘛！」邊位男士想追Macy就好快啲買定架Jeep喇，「係呀，有分加o架，不過其實都要個車主型先得嘅。」
揸大車好緊張
揀男友同揀車嘅品味如出一轍，愛粗獷運動型，本來一心諗住搵架同屬粗獷型嘅寶馬X5畀佢揸，引誘吓佢買番架啦，點知佢嘅回應偏偏又令人有啲意外，「我係打算買番部車，不過都唔會諗巨型車款喇，因為都係用嚟代步，所以都係斯文有型就最好，好似呢架125i咁都幾啱心水。」哦，原來有型嘅定義有好多種嘅。人大咗始終會更識諗，事業剛起步，近百萬嘅X5又點可以話一句鍾意就買吖，加上揸車怕泊車，更怕雙線來回嘅對頭車，大大件嘅Jeep只會令佢更吃力，「我最怕揸車上山頂入赤柱，對面啲車踩晒過嚟，嚇死我，搞到我好緊張，但揸得慢又怕頂住後面啲車。以前又怕去九龍城，成日驚個位細，架車唔夠泊，諗多陣又怕塞住後面。」咁咪有車等如無車？所以架DreamCar留番畀DreamMan揸算啦。
心多多少女
呢架抵港不久嘅125iCoupe車身較細，加速時波箱反應順暢加埋容易操控嘅設計，實在好適合女孩子揸。「我最鍾意佢車身嘅流線型，好靚，同埋有我最鍾意嘅天窗，去到郊外海邊，打開個天窗嘅感覺好舒服，反而揸開篷感覺會麻煩啲。我諗我嚟緊買車時都會先諗實用性，有位畀我擺放開工衫褲鞋襪、化妝品同劇本，載吓屋企人周圍去咁已經夠，呢部125i尾箱夠大，即使係Coupe，但後座都好闊落，幾好。」訪問尾段再追問諗定買邊款車未？點知又嚟一次意外答案。「其實我都有諗過買KCar，車仔細細夠可愛又慳油，都係未定。」呢位少女果然多心，不過車又唔同老公嘅，老公只可以得一個，到你事業更上一層樓咪可以買晒三款囉。
1.Bi-Xenon頭燈真係特別型，成架車都變得Cool好多。
2.車身及側鏡等地方暗藏多條凸起嘅骨位，令風阻減到最低。
3.Macy最唔鍾意超級跑車，「跑車係自私車，房車尾箱夠大先夠實用。」
4.17吋合金軚軨對於車身較細嘅一系嚟講，已經十分夠用。
5.「我揀車齋睇外形o架咋，好似呢部125i嘅金屬流線裝飾就好吸引我。」
6.尾燈細緻又有型嘅設計又係奪少女芳心嘅地方。
7.帶輕微啡底嘅橙色座椅始終係焦點所在，外形內飾有幾型已經係其次。
8.雙區域恒溫冷氣、免提藍芽、軚盤調校音響鍵等豪華配備一應俱全。
BMW125iCoupe規格
引擎：2,996cc直六
馬力：218hp/6,100rpm
扭力：270Nm/2,500-4,250rpm
傳動：6前速+/-自動波
售價：$450,000
查詢：BMWHK（27145271）