政府噚日宣佈委任八個新成員加入博彩及獎券事務委員會,任期由今日起至2011年7月底,其中一個新面孔葉振都活躍於左派社團,係香港青年聯會常務副主席,早前獲政府委任做青年事務委員會成員。
葉振都近年上位甚急,乃因根正苗紅。佢父親葉樹林喺泰國出生,50年代加入共青團,60年代移居香港,做地產同罐頭酒業生意,發迹後頻頻捐錢返鄉下普寧,係廣州市榮譽市民,亦係銀河娛樂集團獨立非執行董事,父親涉及賭業,阿仔入博彩及獎券事務委員會都好啱數。
博彩及獎券事務委員會同時換主席,由容永祺取代鄭慕智,其他新成員包括陳一華牧師、鄭國杰、張偉球、招祥麒、廖湯慧靄、邱浩波同余鵬春。