文弱書生款嘅前學運領袖王丹，喺美國生活自閉到隱青一樣，但原來佢好鍾意運動，係gym嘅常客，早排接受咗台灣政治大學聘書嘅佢，最近終於登陸台灣，首要任務除咗搵地方住、去學校報到同出席無數洗塵飯局外，仲要續番個California健身中心會籍，唔知健身中心老闆會唔會攞嚟做宣傳呢？
向來少談私生活嘅王丹，自從用咗facebook之後，頻頻update自己嘅近況，得閒就post啲日出日落相上去，好鬼詩意。佢噚日話抵埗後仲jetlag緊，凌晨兩點仲眼光光，又話台灣近排熱到爆，「熱到我臉上連表情都沒有」。
台灣係熱，但始終都係中國人地方，親切好多，又可以成日同戰友吾爾開希見吓面，離家門又近一步，王丹新生活應該有好開始。