高官花大量納稅人金錢搞心戰室，其中一項工作係整個blog出嚟同網民溝通，以示與時並進夠晒in，不過高官事忙，唔係咁得閒寫blog，特首網誌最「新」一篇在5月11日出街，財爺鬍鬚曾6月21號寫完後，擱筆個幾月先再開工，噚日網誌一口氣刊出兩篇新文章。咁努力筆耕，可能係唔想俾好勤力寫blog嘅疑似特首候選人梁振英拋離得太遠。
兩篇文其中一篇講鬍鬚曾在樓上cafe同年輕人傾偈嘅感受，另一篇則關於諾貝爾經濟學獎得主克魯明。鬍鬚曾話近日睇咗克魯明著作《TheConscienceofaLiberal》，巧合地早前又與對方在證監會成立20周年晚宴同枱食飯；初次見面，鬍鬚曾趁機討教，兩人都認為今年下半年經濟情況可望較上半年"lessworse"。
克魯明主張政府應該適度介入經濟，鬍鬚曾話政府介入到乜嘢程度好值得討論，又指香港民生開支佔政府支出可觀，要加稅定減福利去維持，係巨大挑戰。咁快就為下年度預算案放風，唔通想引梁振英回應？