無綫新聞被「事旦男」搞到一身蟻，早排TVB代表上立法會時亦被泛民、保皇兩派議員夾擊，保皇議員要求無綫新聞唔好成日報道示威同抬棺材，民建聯陳鑑林就投訴無綫報道民記調查時，成日唔提民建聯個名；白鴿黨副主席卿姐就話咁做已經好畀面，因為TVB連民主黨嘅記者會都未必到。
事隔一個月，無綫外事部回覆議員投訴，交出一份綜合今年上半年新聞報道統計數字，顯示翡翠台新聞用過民建聯一個學券調查，新聞報道時有註明民建聯出品，而民主黨就的確如卿姐所言，該黨做嘅調查一次都冇獲無綫新聞採用。平情而論，好多時政黨做嘅所謂民調水準都十分是但，記者唔報道可能先係專業表現，是但出街真係浪費大氣電波。