碰到文筆有時潑辣，有時溫柔嘅大學Ｔ，問佢乖仔讀書情況如何，講到乖仔，大學Ｔ就眼睛發亮，好歡喜咁話：「九月到UCLA入學！」咁就好咯，原來Ｔ公子讀社區學院，成績爆燈，豈止全部攞Ａ，一啲科仲攞埋A+，於是GPA係四點幾，UCLA梗係接受佢轉學讀三年級啦。到加州讀社區學院就有呢個好處，成績好嘅，可以申請入加州大學嘅不同分校。但Ｔ公子對媽咪講，競爭入學越來越激烈（部份原因係左丁山幾年前不時披露呢條橋，現有大量香港學生在加州攻讀社區學院），今年更碰上加州財赤，難上加難，恐怕以後此路難通！僧多（學生多）粥少（UC學位冇增加）固然係原因，但加州財赤先至係大問題。西雅圖華盛頓大學嘅教授Ｌ最近傳來不少電郵，全部談及加州及美國各地大學嘅嚴重財政問題，最富有嘅哈佛耶魯大削預算，加州大學教授職員全部減薪，減少獎助學金，不願增收學生。另外有一間中型書院直情要將大學校園地契抵押畀美國銀行，舉債一千八百萬美元。加州大學Irvine分校嘅人文學院院長眼見暑期開始後有七八位教授辭職，感到好沮喪，因為最初有教授離職去哈佛耶魯，佢覺得無可奈何，算啦。但現在有教授辭職去Iowa，院長就高呼：「有冇搞錯！」背後原因當然好簡單，教授都係人，錢作怪也。
讀者Ｌ來信詢問佢位公子在會考八月放榜前，已打定輸數，一定做唔成尖子，已得到加州社區學院取錄，預備用左丁山講過嘅方法，希望兩年後轉入加州大學，呢條橋係唔係水尾？左丁山話人之不同，各如其面焉，如要行呢條路，就係明知山有虎，偏向虎山行，學生一定要頂硬上，讀書死砌至得。不過美國大學多如繁星，如果成績好，入唔到UC，仲有其他大學收嘅，睇本身實力與運氣啦。到加州矽谷讀書，最怕貪戀繁華，迷失方向，當地實在非常自由放鬆，兼且科技巨人林立，半個小時車程範圍內，可以見到蘋果、雅虎、Google、惠普、英特爾、思科等等及無數軟件公司，呢啲公司嘅僱員好多已經憑認股權發達上咗岸，消費能力高，故此物價租金不便宜，一個香港十七、十八歲中學生去到，喺適應生活方面，係要落吓工夫及需要家庭關注嘅。
（昨日本欄提及的第三屆硬地滾球賽，舉行日期應在八月一日，特此更正）