騙徒膽生毛，竟然膽敢向香港第一大政黨民建聯埋手，上門到民建聯支部同議員辦事處行騙，擺明剃萬人黨眼眉。《蘋果》噚日報道近日有騙徒以遺失銀包為藉口，先後去到民記沙田同屯門辦事處搵食，要求借一百幾十蚊車錢、飯錢，呢啲行騙招數係好舊，不過至緊要有人受。
騙徒扮可憐即中招
民記算係半個執政黨，叱咤政壇，同官商交手無數，點解咁容易俾人呃，老貓燒鬚呢？沙田支部主席黃戊娣慨嘆好多黨員、職員實情面精心懵，平時街坊有麻煩都第一時間幫忙，騙徒扮可憐入木三分，博同情更係點中死穴，加上有埋報案紙做道具，真係唔中招至奇。有個資深黨員同八方講，民記地區辦事處打開門口招呼街坊，有人上門求助，好難板起面孔拒人千里，如果對方真正有難，民記見死不救咪仲麻煩？
政壇中人對呢單行騙政黨騎呢案無不嘖嘖稱奇，雖則街頭騙案無日無之，但上門呃政黨真係聞所未聞。有人笑言騙徒搵食知碇，睇穿號稱富貴嘅自由黨只係表面風光，其實人人算到盡，冇乜油水撈，民記先係真正有米。該黨噚晚舉行中國原創音樂劇《蝶》香港首演籌款，由於擔心金融海嘯影響，初時目標只係籌450萬元，但民記號召力強橫，據講未盡全力揼心口，籌款數字已經超標，埋單計數最少有750萬元。
是是但但籌款就有幾百萬元進賬，錢銀easycomeeasygo，難怪民記黨員咁疏爽。泛民人士則話從不擔心成為行騙目標，事關佢哋係窮鬼人盡皆知，騙徒盜亦有道，唔會乞兒兜拿飯食。
何必呃得咁辛苦？
其實香港遍地黃金，何必以身試法偷呃拐騙？何況民建聯根本成日派錢益街坊如開善堂，齋宴、蛇宴、旅行任你揀，免費剪頭髮、平價打流感針、廉價影證件相應有盡有，南區支部更有紅酒品嚐會，80蚊位任飲任食，多多着數隨便攞，想食窮民建聯？邊有咁易！
呃民建聯嘅騙徒據講只係掠水幾十元至幾百蚊，真係濕濕碎，相比民建聯話支持07、08雙普選，一鋪過賣晒全香港人豬仔，呢啲先係真正大茶飯呀！