轆Book：周末例爆　赤柱搵位最有機

一到夏天，各大泳灘未逼滿人，車位肯定先爆，儘管政府猛叫大家坐交通工具，免得過都唔好揸車，但周末車位照樣爆到要封路。港島泳灘車位有限，基本上無必勝攻略，但想機會大過人，幾處鬼馬位你一定要知。

記者：徐影龍
攝影：譚盈傑
Model：Alia@PureModels

赤柱最多位

揸得車遊港島，深淺赤石一口氣串起嚟行，已屬基本路線。由堅拿道天橋入，穿過香港仔隧道左轉上山，已正式開始深淺赤石之旅，周末想安心泊靚架車遊山玩水，晏過八點已係癡人說夢。四大泳灘加埋南灣，最有把握肯定首推赤柱，市集上幾列街邊咪錶，落啲有車場錶位，知碇嘅揸入啲去埋聖士提反灣一樣得，全區加埋近百個錶位，已贏晒其他泳灘。若然不幸爆滿，赤柱廣場上方佳美道，仲有兩個爛地停車場，最近嘅$6/小時，行多兩步再平啲，$5/小時，平過街位又毋須心掛掛定時入錶，OK㗎。最後黑仔到連爛地都唔受你玩，大不了轉右揸入廣場停車場，約270個車位，不過就勁貴，星期五、六及日首兩小時要$28/小時，第3小時起$34/小時。

聖士提反泳灘　易泊度80分

■優點係水清少垃圾，有救生員有小賣部，收工興起不妨過去減吓壓。

■過咗市集轉入黃麻角徑就到，約有20個車位。

市集前錶位　易泊度80分

■未到市集，由赤柱村道轉入赤柱崗道，有大量錶位。

■街錶全部係S位，好在格仔闊落唔算難泊。

另類選擇　易泊度70分

赤柱廣場上方佳美道，行幾分鐘有爛地車場，$5-6/小時。

神秘代客泊車博唔過

除咗赤柱，其他幾個泳灘嘅錶位，真係少到令人發，深水灣、淺水灣錶位太近泳灘，唔使搵路都識泊，喪爆係意料之內，好彩行遠啲仲有若干隱藏錶位。名人明星最鍾意去嘅南灣，車位唔多，但勝在巴士去唔到，泳灘唔算太逼人。石澳就最誇張，由於歷史地權問題，好多車位都被原居民霸住，仲要全部係免費咪錶，周末朝早八點去到都要碰運氣，差佬晨早封埋入口迴旋處，叫你死心U-turn掉頭走。有傳聞話石澳都有神秘代客泊車，日泊約$100，有專車接載你到附近某地泊車攞車，但由於屬非正式停車場，又唔知乜水幫你睇車，風險頗大，唔多值得博。

石澳　易泊度60分

石澳係少有具免費車位嘅泳灘，周末搵到位泊車，記住買六合彩。