賭王三房女兒何超雲同四房女兒何超盈前晚孖公仔喺金鐘捧TsumoriChisato時裝騷，仲同designer合照，韓星崔江姬、盧巧音、諸葛梓岐都有捧場。有拖拍嘅超盈神采飛揚，仲話會介紹高大靚仔嘅男仔畀家姐超雲識㖭，不過家姐就話好鍾意超盈個男友Grey，仲大讚佢斯文，要個妹介紹Grey朋友畀佢識。
超雲開銷魂閣
曾經同唐貝詩（Lydia）係好友嘅超盈前晚話佢哋已經冇friend做，超盈話：「我哋唔係朋友好耐，本身都唔係真係好friend，係你哋話啫。」之後記者再追問係咪Lydia出賣過你？超盈話：「差唔多啦！係性格問題，我哋唔係好熟，只係識埋同一班朋友。」
此外，超雲噚日正式簽約開二手衫店做老闆，佢話：「我成功叫個業主減租，個舖喺中環蘭桂坊，希望8月底返英國之前搞掂，爹哋用口支持，仲幫我改名叫做銷魂閣，聽到我頭都暈，我想用英文名，阿媽都拎咗好多衫，我自己就有3、4袋，裝修方面我仲會親手喺牆上面畫畫。」
另外，賭王另一千金何超瓊（Pansy）前晚去中環HarveyNichols行街shopping，本來佢睇中咗個手袋，但研究完一輪之後都係放棄唔買，改買另一條紅、白色頸鏈，總算有收穫。
