洛陽玻璃（1108）停牌近三年，昨日終於「放監」，股價最高升至2.27元，係01年6月以來高位，收市則報1.89元，比停牌前0.87元大漲117%。星俠認識一位散戶朋友持有洛玻，而且貨量仲唔小，經過昨日解放，佢個投資組合成績當然唔使「落坡」，梗係值得高興。
股海氣氛火紅熾熱，大家似乎憧憬「大笨象」滙控（0005）份成績表會有驚喜，所以唔少人都覺得港股後市有力上試21000點，所以都幾放心入市買貨。大市昨升339點報20573點，幾日前所出現之霎時大跌已冇乜人記得，股市升跌無常，唔通散戶真係咁善忘？
講到拖動大市向上闖關，大把藍籌股都具備資格，又點少得中移動（0941）？其實中移動最近股價重上80元，表現已經算唔錯，只係市場上其他股份表現更勁，令中移動鋒芒稍為被掩蓋。中移動本周初一度升至83.80元，未能突破6月中高位84元而出現回吐，但80元支持位十分硬淨，昨逆市跌0.05元收81.40元，預期後市港股衝頂將由中移動領軍，不妨伺機吸納，目標睇90元。
中移動要炒起其實唔愁冇藉口，事關紅籌股回歸A股係時代大趨勢，市場預期今年底有望成事，以級數計，中移動無疑係大熱分子。
方星俠