六四20周年加上7.1遊行，泛民政黨今年街頭籌款數字理想，社民連更係豬籠入水，籌到40萬元，連同其他撲水活動，足足籌到150萬元，買新會址大計可期。八方聽聞社民連早前睇中上海街一個筍盤，可惜慢人一步落定，失諸交臂。
樓價近日急彈，社民連高層睇住樓價升完又升頭都大埋，為免摸頂，決定待樓市冷卻時再考慮入市。據社民連中人講，黨主席毓民為咗幫黨撲水，即使放暑假亦非常唔得閒，去美加探仔敍天倫同時，會在當地舉行多場「尋找不該的故事」棟篤笑，即場推銷掟高官嘅「雙節蕉」更加唔少得。美加有唔少香港移民，估計有一定叫座力，反而最高難度係賣書籌款，一本賣港銀78蚊嘅書，空運到美加要賣50美元或加幣。