早排講過搭的士畀錢有價講嘅問題，行家「醫咳Baby」睇完話自己好均真，點都無情講，唔會無喇喇平十幾蚊畀人，費事做壞規矩，「個錶幾多就收幾多，唔會收貴亦唔會畀折。好似上個禮拜咁，又係載住個靚女，去到目的地話得張五百蚊紙，我啱啱先開工，邊有得找呀？佢話落地㩒機，咁梗係要佢擺低張身份證穩陣啦，點知靚女企硬唔制，僵持咗幾分鐘都係算數，放佢去㩒機。大佬，分分鐘走咗去血本無歸o架！」聽落有道理，但「醫咳Baby」嘅諗法實在好老套，堂堂靚女點會呃你一百幾十蚊的士吖，係你自己唔肯收張大牛咋喎，叫人擺低身份證好唔尊重啫。拗都拗咗幾分鐘，又阻住自己做生意，大牛係法定貨幣無得拒收，若然激嬲人報埋警，你話邊個蝕底嘞，揸車搵食點可能咁唔識轉軚o架。不過作為的士佬，我都希望乘客體諒，盡量唔好畀大紙啦。
文：黃師傅