中貿林與餐飲M、餐廳羅等一行六人應楊社長之邀，到將軍澳吃午飯，順便參觀廠房。外匯C事後話：「聞到臭味」，中貿林話：「望出去風景優美，山麓綠草如茵，有如高爾夫球場，好靚好靚。誰知道草皮下就係垃圾垃圾垃圾，知道咗就冇晒癮。」餐飲M有親戚住在近海屋苑，不時忍受清風送來臭味，忍得多就當冇嘢喎。
馬主N來電，叫左丁山有時間就在八月一日去將軍澳中心睇吓第三屆亞太區硬地滾球賽活動，下午一時至四時舉行。咦，滾球係冷門活動喎，以前最多會在九龍覺士道九龍木球會與九龍滾球會見到，現在稍為普通一啲，沙田第一城對開城門河畔就有一個公眾球場。馬主N話八月一日呢個活動係為殘疾人士而設，由香港殘疾人奧委會暨傷殘人士體育協會主辦嘅，唔講唔知，呢個協會嘅主席就係馮載祥夫人馬潔嫻，Jenny姐係大公司公共事務始祖，退休後熱心公眾事務，致力推動殘疾人士運動。
硬地滾球不同草地滾球，英文稱為Boccia，特別為殘疾人士設計，限於殘奧會內舉行，在二○○四年雅典殘奧，中國香港隊第一次派員參加，得到兩面金牌，在去年北京殘奧，香港取得一金一銀。即將於八月十四至二十二日於九龍公園體育館舉行嘅第三屆亞太區硬地滾球錦標賽，另有意義，各國隊伍必須今次取得團體隊分數，再在2010年葡萄牙世錦賽、2011年日本世界盃得分，計累積分數排名，先至可以爭取資格參加2012年倫敦殘奧嘅硬地滾球賽。香港有兩位選手郭海瑩（北京殘奧BC2級金牌）及梁育榮（北京BC4級銀牌）有希望得分兼奪標㗎。
參加硬地滾球嘅殘疾人士係患上痙攣嘅人士，佢哋須有堅強意志及鬥心先至可以熟習呢項運動，佢哋嘅精神好值得我地尊敬。馬主N話硬地滾球係非常冷門嘅運動，無傳媒理會，亦屬香港地正常之事，但佢希望盡最大努力，喚起注意，希望香港市民對痙攣人士參與硬地滾球，多方鼓勵及支持，譬如馬會咁，出錢出力幫助香港取得第三屆亞太區硬地滾球錦標賽主辦權，就係良好企業嘅例子。