近期太陽實在好猛烈，身邊有唔少朋友都曬到變晒黑人，嚇到啲愛白美少女個個大叫要防曬。其實要防曬嘅何止美女，仲有載你出出入入嘅愛車，要幫幫佢擋擋太陽。汽車變蒸籠，最後受苦嘅都係自己。市面上嘅太陽擋款式多不勝數，花款多多仲可幫手美化香車，用完之後你就會發現，「原來真係可以凉咁多！」
記者：許維雅
攝影：陳陶鈞
Model：Sansu@Puremodels
車頭太陽擋 防錶板老化
車用太陽擋，可避免陽光直接照射車廂，溫度都會低好多。全車最需要做防曬措施嘅，固然係車頭最大嗰塊擋風玻璃，唔喺呢個位擋擋陽光，唔單止軚盤燙手，錶板亦會因經常暴曬而容易老化，某啲車款嘅中控台物料甚至會溶，唔係誇張，所以幾十蚊一塊嘅太陽擋絕對唔可以慳。其實大部份擋風及車尾玻璃用嘅太陽擋款式多年不變，都係風琴式摺合設計，方便收藏，物料則以反光錫紙料為主，唯一變嘅都係圖案而已，當中以卡通公仔最大路，而呢一類亦最經濟實惠。除咗公仔圖案，亦可揀選一啲較專業嘅品牌，隔熱效果更佳。
RacingPIAA特厚身太陽擋$228（a）
日本專業品牌，較厚身，據說有更佳隔熱效果，真係貴得有道理？
HandySunshield細摺風琴式趟擋$158（c）
拉趟式，要用膠水貼於車窗，靈活度較低，但適合經常在戶外暴曬嘅工作車用。
HelloKitty車尾擋$45（b）
要全面保護，仲可以用埋車尾太陽擋。
側擋 透明料大路
遮擋前後兩塊大玻璃仲係覺得唔夠嘅話，可以用埋兩邊側擋，由於兩側玻璃受熱程度較低，所以側擋物料都係以遮光度較低嘅紗料為主。款式方面跟太陽擋一樣以卡通公仔選擇較多，當然都係不離HelloKitty、小飛俠、小熊維尼等等。要留意嘅係，一般側擋都係以吸盤形式安裝上車窗，所以吸盤嘅質料都好重要，該選較柔軟嘅。除咗可愛卡通公仔，當然仲有其他選擇，好似窗簾型同適合後座側窗嘅拉趟窗簾式遮擋，而我就最Buy靜電貼式嘅設計。
WAKO黑紗簾$130/對（a）
窗簾型較另類，帶神秘女人味，有紗及布兩種質料，紗嘅透光度稍高。
黑色網面靜電貼$28（c）
利用靜電將擋太陽嘅薄片貼於車窗，無阻車窗升降，又可隨意撕貼。
查詢：
a/台日汽車用品公司（23924244）
b/偉良汽車配件中心（23842464）
c/AES汽車配件用品（23910370）