外國領養風氣甚盛，如麥當娜、安祖蓮娜祖莉等，相反香港藝人則鮮有聽聞。騷味不減當年的張慧儀，萬料不到竟然已經有個仔！現長居北京做生意的她，三年前做義工，誰知這就領養了當時有心臟問題的兩歲Hanson。未婚的她目前以兒子為重心，替他煮飯冲凉，當正親生兒子看待，她甚至說兩人感情比一般母子情更深厚。
記者：林佩婷
攝影：陳盛臣
場地：O'Carol（21428121）
單身領養心臟兒
慧儀在北京工作，朋友介紹她到專收容有身體毛病小朋友的平安之家做義工，就在那裏和Hanson結緣。看得電視多，孤兒為爭取新父母的青睞，都執得比平時整齊，但慧儀同Hanson初次見面竟在浴室。當時Hanson身體不好，臉紫口紫，但慧儀竟然覺得好可愛，還立即問院長可否帶他出去玩。「第一次有個保母跟住我哋，最初佢都有少少驚我，玩完返酒店竟然叫我做媽媽，嗰刻個心即刻溶化咗。」就是這聲媽媽，讓慧儀立下領養決心。
早有待養家庭？
不過講易行難，原來Hanson一早有外國待收養家庭，且院長知慧儀是藝人，怕她只得三分鐘熱度，但慧儀堅持每日帶他出街、回家午睡吃飯，以無比決心令院長跌眼鏡，就算只可寄養一年也要爭取。皇天不負有心人，最後外國家庭領養泡湯，於是她正式提出申請。但問番當日為何會有這樣大的決心，她都答唔出。「未見Hanson前根本無諗過領養小朋友做媽媽，個小朋友出現得好突然，但我聽從自己內心聲音咁做，覺得好舒服。」
朝6湊仔返學
Hanson心臟有多樣毛病，小時候更曾昏迷9星期，大腦缺氧影響了說話能力，2歲都只能說單字。所以最初兩人相處要估估吓，但正正使慧儀的性格變得更溫順、有耐性。「醫生雖有提過囝囝個病其實好嚴重，但我每日都幫自己做思想輔導希望有奇蹟，我唔會當佢係病人，最緊要珍惜呢一刻。」慧儀自言身兼父母及好友三職，每朝6點起身湊仔返學，放工即回家，從此戒絕夜生活，急躁性格也因此改變。
領養一間孤兒院
外人看來，單身領養已很難理解，更何況是個有病的孩子。而慧儀家人亦被蒙在鼓裏，直至慧儀媽咪某日抵京探望才驚訝發現，「媽咪都有講將來結婚或生仔咁點，我個人覺得如果對方真係愛我，必定會愛屋及烏，反而Hanson可以幫我做過濾工作。而且我年紀都唔細，生小朋友機會亦唔大。後來媽咪同佢相處過，都覺得Hanson好討人喜歡，好快就接受咗，遇着我要出外公幹，媽咪仲會嚟幫我湊。」問到將來還會不會再領養，她竟另有宏願，說希望幾年後能和院長合作，接手平安之家的照顧工作，讓更多小孤兒能健康成長有書讀，目標會比單一領養更偉大。
“幸福其實好簡單，家每日放工煮飯、同佢玩、一齊讀書，星期六日啲時間畀晒佢。雖然體力付出辛苦，但心靈好幸福滿足。”
