不停在內地、台灣兩邊飛，甚少揀選在香港工作的曾寶儀，最近答應亞視主持《亞洲星光大道》，除因被亞視感動外，還希望接受新挑戰，第一次以廣東話主持歌唱節目。38歲的曾寶儀無計劃結婚，又不急於生仔，還學足父親曾志偉「最緊要好玩」的人生觀，大讚父親說：「佢一世人過咗人哋五世人嘅生活。」
在台灣長大的曾寶儀近年經常往內地工作，主持、司儀、拍劇對她來說，絕對不是難事，不過，最近她夥拍林曉峰為亞視主持《亞洲星光大道》，跟父親曾志偉所屬電視台打對台，為何她會答應亞視做《亞洲星光大道》主持？
「三顧草廬有誠意」
曾寶儀說：「我覺得係誠意，其實我喺大陸台灣都好多嘢做，之前我來來回回經過香港，佢哋都會嚟見我，同我傾，就好似三顧草廬，我覺得亞視有變化性，好有彈性去做，最驚就係冇創意，歌唱比賽節目萬變不離其宗，我哋主持都係畫龍點睛，參賽者先係主角。」不過，亞視有時太有創意，最後弄出不少笑話，例如亞姐全民投票，她說：「係呀！我都有問點解今次比賽唔全民投票，好似內地《超級女聲》，原來瀨過嘢！」
曾寶儀在內地及台灣擔任過無數大騷司儀，做過很多不同類型節目主持，但是今次是第一次以廣東話主持，曾寶儀認為是一個挑戰。
廣東話主持當挑戰
曾寶儀說：「我都係第一次用全廣東話做主持，今次都係一個挑戰，有時廣東話未必轉得切，又可能諗唔到乜嘢說話同詞語恰當去形容當時嘅心情，真係有啲難度。」38歲的曾寶儀無論身形外貌都保持得不錯，她說：「最緊要係心境，以前做嘢好勤力，覺得後生要打拼，人大咗家唔同咗，人生係要有得做有得玩，最緊要開心，以前都唔理解爹哋嘅諗法，家開始明白，所以佢一世人過咗人哋五世人嘅生活。」至於結婚生仔的問題，她說：「適婚年齡，到咗好耐喇！冇乜計劃同打算，家都廿一世紀，所有嘢唔係一定要做。」
採訪：楊潔雯 攝影：仇志德
場地提供：都會海逸酒店
