亞視搞嘅《2009年亞洲小姐競選》，香港賽區嘅招募行動喺7月9號正式啟動，今次嘅招募行動直到8月10號先會截止，噚日亞視安排咗07年嘅冠軍張家瑩、友誼小姐吳嘉星、魅力秀髮大獎黃倩婷和筱靖，聯同08年內地賽區冠軍陳莎等5個歷屆亞姐，去咗淺水灣沙灘度派發亞姐報名表。
不過噚日呢班亞姐認真唔好彩，去到淺水灣嗰陣撞正落大雨，搞到要匿喺車上避雨，點知去到沙灘嗰陣，又唔多見到合適嘅人，反而吸引咗一班攝影發燒友，個個係咁追住佢哋影相，而且仲有一個外籍人士趁機攬住張家瑩條腰影相。
筱靖讓冠軍攞威
事後張家瑩講起呢件事，佢就笑笑口話：「我諗呢啲只係禮儀，佢都好友善，我着得咁密實，冇嘢睇喎！不過影相嗰陣都有少少尷尬，始終我都唔識得佢。」家瑩仲話個男仔想做佢男朋友，不過就冇開口同佢講。後來張家瑩話佢有信心今年亞姐嘅質素會好過港姐。
另一個亞姐吳嘉星都認同張家瑩嘅講法，嘉星話：「呢啲係根據我呢幾年嘅觀察同埋傳媒嘅統計，加上亞姐招募嘅地方比香港小姐多，搵靚嘅女仔機會當然大。」而一向性感打扮嘅筱靖，噚日收起性感，於是有記者笑佢輸蝕，不過佢就話：「唔係次次都着泳衣呀！呢啲都係公司安排，而且仲有啲冠軍喺度，焦點畀番佢哋好啲。」
