我求大俠當年考車牌排唔到好期，晨早流流要應考都算，最慘係之前嗰晚開工捱夜，完全冇態，嗰種騰騰震入試場嘅感覺，未必人人明，不過AC米蘭新帥李安納度就實明。眼見AC季前狀況千瘡百孔，好衰唔衰喺新一季意甲第2輪就要硬撼死敵國際米蘭，話唔定呢位少帥李安納度正嘆氣：何必咁早要「考牌」？
老鬼防線友賽大漏洞
意大利聯賽會前晚公佈新一季意甲賽序，高潮位好罕有咁喺第2輪出現，上演米蘭打吡。有信心嘅話，早同遲當然冇所謂，但係睇見AC前晚喺奧迪盃被拜仁慕尼黑打到落花流水輸1:4，證明由尼斯達、森保達、費華利幾個老鬼支撐嘅防線真係好唔掂；至於由派路破蛋嗰個自由球亦唔見得精采，而被寄予厚望嘅朗拿甸奴更踢到無影。
伊度奧向AC下戰書
李安納度賽後死撐：「我承認隊波係要執，但1:4嘅戰果太殘忍，隊波未致咁差。」講就咁講，隊波近4場友賽全敗，假如以咁嘅狀況再鬥由摩連奴領軍嘅國際米蘭，好難唔再輸啫。
「考期」既定，李安納度只得頂硬上，而佢將會發現「考官」唔係摩連奴，而係國米新兵伊度奧。呢位喀麥隆射手急不及待向AC下戰書：「我曾經喺歐聯（05/06球季）幫巴塞隆拿作客贏AC米蘭，估唔到咁快就對AC，今次一樣可以令佢哋喺聖西路輸波。」
可能考試嚟得太快，冇辦法唔臨急抱佛腳，嗰頭傳出AC已經宣佈放棄斟路爾斯法比安奴，呢頭又有消息指佢哋重新提出斟介。之前AC出1,250萬鎊（約1.6億港元），據講同西維爾要求嘅轉會費差400萬鎊。睇過隊波最近嘅演出，又大戰當前，速速磅水買人啦！
意甲首兩周焦點場次
第1周（22-23/08）
國際米蘭vs巴里
祖雲達斯vs基爾禾
錫耶納vsAC米蘭
第2周（29-30/08）
AC米蘭vs國際米蘭
羅馬vs祖雲達斯
註：前者主場