新一屆港男啱啱選完，但06年港男冠軍黃長發嘅風流戰績就繼續高潮迭起。過去大半年佢同鞋王三奶李姿霆（Karen）嘅不倫姊弟戀搞到全港皆知，由熱戀到掟煲，呢頭散嗰頭又有富貴契媽Christine同舞王霍紹裘女友Sindy陪伴，徹頭徹尾不愁寂寞。不過24歲嘅黃長發唔單只同中女有緣，後生女一樣把炮，冧女功夫確有一手。
搭膊頭又攬腰
噚日本報收到讀者提供一批黃長發嘅照片，來源出自一個交友網，blog主post咗唔少黃長發開P嘅相，相中嘅黃長發身穿緊身tee，左擁右抱幾位年齡相若嘅吊帶背心長髮女，當中有女嘟嘴扮錫，又有女仔同佢身貼身攬攬。黃長發就來者不拒，唔係搭住女仔膊頭就係攬人哋條腰，表現相當親密，相信佢同呢班女仔非常熟絡。
女友訴失戀苦
混喺女人堆中嘅黃長發一臉風騷，馮仁昭當然唔知佢同個blog主交情如何，但該blog主最新留言係「原來失去了你，才懂得珍惜和你一起相處的時間。」似係顯示失戀心情。橫掂黃長發做緊量地官，唔知佢會唔會趁得閒開解吓啲朋友呢？
