正生守得雲開，默默幫助沉淪毒海青少年嘅工作越來越多人知道後，亦越來越多人幫助正生，早前聯同蘇浙滬同鄉會合共捐款100萬元畀正生嘅「股壇廚神」黃坤同政協劉夢熊，又再穿針引線安排富豪飯局，前晚相約龔仁心同正生校監林希聖、校長陳兆焯食飯。席間龔仁心代表華懋慈善基金捐出40萬元畀正生，即場交支票，十分爽快。
陳振聰一方：太濕碎
龔家咁慷慨，陳振聰卻似乎冇乜特別反應，八方向陳振聰方面查詢會唔會捐錢畀正生，佢哋話「太濕碎」不予回應，至於係話龔家捐40萬元太濕碎，定係認為捐錢畀正生太濕碎則冇解釋。雖然外傳陳振聰要變賣資產撲水，但區區幾十萬元，對哨牙通而言可能真係太濕碎，佢又點會志在吖！
陳兆焯校長話華懋呢筆善款冇指定用途，會用於學校發展，佢話近日確係多咗好多有心人資助正生，日前有對夫婦由東涌搭的士去梅窩，坐船到長洲後轉街渡去正生，長途跋涉舟車勞頓無非係為咗放低張支票，令人十分感動，真係無以為報。
好事傳千里，陳校長話連CNN、BBC等國際傳媒都有採訪正生，佢又曾接受美國三藩市一家電台訪問；有對居住喺美國田納西州嘅夫婦，透過傳媒知道正生情況，聯絡校方表示想嚟香港到正生做義工㖭。正生變成名牌，由學生執筆講述戒毒故事嘅《我們是正生好孩子》第一版6,500本喺書展沽清，要即時加印3,000本應市，陳兆焯話書展有熱心人一口氣掃走500本書。
正生新書出英譯本
正生學生脫離毒海重獲新生事迹感人，據知稍後可能出版英譯本，而且會添食出版第二、三集，將更多正生學生改邪歸正故事公諸於世，希望對其他人起警惕作用。雖然咁多熱心人撐正生，可是學校搬到梅窩事宜仍然膠着，陳兆焯話暫時未有進一步消息，但有信心政府會協助解決問題。
mailto:[email protected]