時下興環保，隨處見回收箱，最近更實施膠袋收費。但除了這些表面的措施，似乎看不到更大的普及性，只餘某部份社會人士默默支持。育有一子一女的阿珊，從事業女性退下火線，即全身投入環保生活，由個人回收到家用物品DIY，進而惠及朋友，再推廣至社區，比政府還要積極進取，為的就是──下一代。
記者：林佩婷
攝影：陳盛臣
花園變身 生果香草園
阿珊自小已愛DIY，但作為事業女性無暇兼顧，及至大仔樂之出世全力湊仔，才有喘息空間反思過往生活方式，重尋自己的生活樂趣的同時，積極推動環保，自製潤唇膏、洗頭水、橙皮清潔劑、肥皂、牙粉……甚至飛身台灣學紮染。未止，蔬果都吃婆婆種田的收成、平時實行有機團購、社區進出以單車代步、又參加不同機構舉行的環保課堂作有機大使……仲未止，索性將家中花園變生果香草園，務求生活更健康。一切一切，「原來實行環保好容易。」阿珊話。「好似只要屋企有攪拌機就可以整到再造紙，紮染原料有好多好天然，例如菜葉、咖啡、樹葉等等，只要有心，咩都可以DIY。」由於成績超卓，不少社區中心或學校都邀請她做講座，將多年經驗和人分享。
子女着舊衫 儲分制推動
分享的人，第一個當然是兒女。他們着的衣服，都是執人舊衫。也當然，8歲細女樂思曾叫媽咪買新裙，但媽咪一句打開櫃看看，囡囡便不堅持。玩具呢？唔講都知，自製為主，如奶粉罐變高蹺等。仲有仲有，她還實施一系列措施，明教導暗誘導孩子不要浪費。「我設儲分制，好似食飯食得晒自己嘅飯量、冲廁先用儲低落嚟嘅水等，就有分加。相反浪費電力包括唔記得熄燈熄風扇等就要倒扣。儲到嘅分有獎賞，例如可以用嚟打機。」
全家拾荒 實踐垃圾領養
別以為上述只是個人環保興趣，阿珊推己及人，將發掘到被拋棄的有用家具，影相放上網讓有心人認領。「我住嘅屋苑主要係中產人士，好多人搬出搬入或裝修，掉嘅家具都仲好新淨，有日我見垃圾站有套全新嘅馬桶連洗手盆套裝，覺得好浪費，就即刻度好尺寸影張相，放上網Forward出去睇吓有無人要。自此，就開始咁做。」最意想不到的是，樂之受媽咪感染，有日見垃圾站前有套頗新的小童書桌，即同工人姐姐及妹妹搬回家，還很開心跟父母分享是次經驗，最後張枱用到爛先捨得掉呢。
綠色行動不勝枚舉。她從前人拎樽買油得到靈感，提議賣方用大袋裝滿，再讓顧客自己拎樽購買，以省膠樽。只是用諸凉茶舖時卻遇挫折：「最記得有個女店員話『帶環保袋出街都嫌麻煩，何況拎個樽買凉茶！』呢個就係香港人典型想法，不過我會繼續游說，希望下一代能生活喺個健康世界。」
一屋買家．綠色之家
想更了解珊一家的綠色生活，可於今天晚上7時在無綫電視翡翠台觀看香港電台電視節目《一屋買家》。
網址： http://www.rthk.org.hk/special/consumer
