新鴻基副主席郭炳江噚日去馬灣挪亞方舟，同一班曾經誤入歧途青少年講做人道理。有後生仔問郭炳江後生嗰陣有冇受唔住引誘行錯路，郭炳江自爆年輕時都做過「長毛」，當年嬉皮士文化盛行，好多後生仔憤世嫉俗、食大麻，幾乎個個男仔都留長頭髮，又不修邊幅，一套衫着成個禮拜都唔洗，放蕩程度同時下索K青年不相伯仲，當然後來大部份人都正常番，任性嘅日子過咗就算。
挪亞方舟有好多動物模型，有人問郭炳江自覺似邊種動物，佢話自己細個時最鍾意獅子，因為夠勇猛，後來覺得自己似駱駝，因為忍耐力好，但最想好似鷹咁眼光銳利。八方覺得郭生最似蝴蝶，因為佢應該最鍾意遊花園。