因肺積水兼不慎跌傷左腳嘅林蛟（蚊叔），噚日喺瑪嘉烈醫院接受記者訪問，佢中氣十足話：「等醫生檢查埋今日應該可以出院，冇晒事啦！肺積水都冇事喇。」88歲嘅蚊叔，平日做好多運動，佢話：「我一星期有三日去馬會游水、焗桑拿，又會耍太極。」講起以前學功夫，蚊叔仲好醒目咁話：「我係北派嘅，試過拍戲由6樓跳落嚟冇事，仲勁過成龍呀！」