本港電訊網絡供應商一向競爭激烈，不過戰場似乎已經由手機同固網市場，轉移到隨身流動寬頻。
噚日數碼通（315）總裁黎大鈞，就同華華仲有一眾傳媒人，分別去咗中環、灣仔同數碼港，以用家角度去測試對手之一嘅CSL，早前推出嘅Express21流動數據器，下載速度喺咪可以達到所講嘅21Mbps。結果，喺三個地方，最高上、下載速度都分別得嗰3.9Mbps及1.7Mbps，似乎名不副實喎！
黎總裁話，覺得同行咁嘅宣傳手法好夾硬嚟，又認為咁做會影響同抹黑其他台嘅誠信，仲話已就事件用客戶身份同電訊管理局投訴，但到家都未有回覆。
華華問返CSL規管及企業事務主管艾廸勤（DavidAitken），佢喺覆返畀華華嘅信入面，話數碼通嘅指控失實，對佢哋嘅言論保留法律追究權利。David話，求其搵幾個地方做測試，冇可能有準確結果，又反問數碼通喺咪有意投資一項新網絡，同CSL嘅NextG競爭？最後仲加多句：「己所不能、勿阻人為之」，火藥味勁重！其實行業間有競爭先有進步，最後受惠嘅始終都係客戶！