內地股市昨日午市忽然急挫，事前毫無異狀，散戶當然唔知發生乜事，港股下午未到開市，散戶即時收起買盤，將沽盤改價直掟，但識「沽」老馬都知改現價沽都未必沽到，所以索性沽低幾格，務求下午個市一開就可以做到盤。
點知下午開市即跳空而落，唔少股份跌勢比想像中更急，星俠身邊唔少散戶，即使開市前將沽盤改低幾格都一樣做唔到盤，可想而知當時市況幾咁恐慌。
港股是否轉勢，仍要睇多兩三日才能下定論，星俠視昨日急瀉，係一次「空軍」演習，到有一日嚟真，個市就未必有即市反彈呢支歌仔唱。
大行高盛叫沽
中國遠洋（1919）發盈警，其實唔令人意外，但大行高盛出報告，估計該股全年蝕逾百億元人民幣，仲列入「沽售」名單，股價冇反應就奇，下跌6.7%，收報10.82元。
中遠前日升唔破12元，高位出現十字星形態，雖然昨日暫守得住10日線，但仍以陰燭下跌，技術走勢偏淡，加上股海氣氛詭異，唔建議家陣撈貨。
方星俠