立法會通過禁煙法例，令香港變成無煙之城，不過有議員可能知法犯法。立法會秘書處接到投訴，指有議員同議員助理違法喺中區政府總部西座議員辦公室吸煙，秘書處算厚道，並冇公開違法者是誰，不過邊個議員或議員助理係煙民，唔使指名道姓，大家都應該心中有數。
雖然接到投訴，不過相關部門冇鐵腕執法即時檢控，亦冇透露有冇派員巡查。
向議員先禮後兵
秘書處先禮後兵，噚日向全體議員發出通告，提醒大家政府總部辦公室、梯間、電梯大堂、各入口接待處、職員餐廳，連埋戶外停車場、天台等統統係禁煙區，煙癮起要頂癮，請移玉步至指定戶外吸煙區。
秘書處對煙民十分體貼，通告附有相片及地圖顯示吸煙區位置，總之大家要吸煙，請自動自覺到黃線區內，如有問題可以聯絡中區政府合署無煙政策統籌員，八方都係首次聽聞政府內設有呢個職位，特區政府創造就業果然不遺餘力。