中環國金二期大堂，噚日早上守衞森嚴，保安人員如臨大敵，事關中共統戰部部長杜青林來港訪問，噚日專程到國金恒基地產總部，同四叔開早餐會，之後再到金管局與10月離任嘅金管局總裁任志剛見面。
杜青林親訪四叔當然有原因啦，四叔06年底在內地推出「溫暖工程百萬農民培訓計劃」，至今捐款逾四億元，成件事與統戰部合作，前任統戰部部長劉延東親自直接跟進，杜青林接棒，今次來港親自同四叔會面，都好合情合理。
據講，四叔左右手林高演同長子李家傑，晨早9點未夠，就喺國金二期大堂恭候杜青林，杜青林一行廿人，直上76樓恒地總部會合四叔與次子家誠，一齊進行半小時早餐會。
之後，就輪到任總喺大堂等杜青林，帶佢哋上金管局坐坐嘞。談話內容當然保密啦。