根據近期窩輪資金流，唔難預示下一步應該係邊類股份會跑出，當然，當本欄本着知無不言的理念，將市場中較容易察看和捕捉的尋寶機會告訴大家，是基於街外錢大家搵，無必要明明見到都要收收埋埋，只係無論投資者抑或投機者，都唔難明白點解當一種指標越被更多人用作決策參考，該指標的準繩度就會隨之打折扣。
近期流入認購證資金對正股股價未來表現，稱得上極有啟示性，例如早前中石化（386）股價還在5.6元水平發緊吽哣嘅時候，輪場所見，資金已靜靜地在相關認購證中起革命，終於在經過近一個月密密吸、默默索嘅漫長收集期之後，正股終於成功一舉突破，並爆上6元之上，既漲窩（引伸波幅）又升埋輪價，有啲輪直頭由價外變成價內，連對冲值（Delta）都賺埋，簡直和味過和味龍。
之後呢群機購投資者/專業投資者/大戶或專業炒家（通通都係P.I.嘅簡稱）再食髓知味，再於中移動（941）身上翻啅，於正股仲係喺73蚊附近等緊運到嘅時候，呢班底厚兼忍耐力特強嘅大戶，成功將新出嘅認購證三扒兩撥掃晒。
下一站──中電信
當然，假如人掃你又掃，自己都要識路唔好盲摸摸，睇住自己揸緊嗰隻有無出現縮窩情況，更加要留意所有已發行嘅貨源，是否已成功賣晒出街，最怕係一旦通街都係貨，發行商大可闊佬懶理（事實係想理都未必理得掂，皆因手上唔夠貨維持秩序），結果就算正股上升，通街漲窩，羊太就會發現自己揸住嗰隻竟然會縮窩，結果因升唔足而斯人獨憔悴。
講完兩單馬後炮例子，看官當然最想知道下一個被鎖定嘅目標係邊隻。大家有否留意，近日個認購證市場出現單日明刀明槍搶中電信（728）認購證嘅場面，假如情況持續，配合正股在跌市中仍能力挽狂瀾，連10日移動平均線亦守得住，雖然同日亦出現不少同類震倉分子，部份收市更成功倒升，大難不死，必有後福，關鍵係中電信股價走勢，與早前中移動升破3頂後再爆上異曲同工。認購證啟示能否再次應驗，詳情除可留意《窩輪攻略》節目外，或觀察相關認股證買賣數據，同時追蹤正股股價變化。
胡孟青