最近股市交投暢旺、越升越有，令散戶敏感嘅神經更加容易被觸動，只要認為那隻股票有炒作機會，就即刻瞓身追上去，期望賺番筆。前日（27日）表示涉及控制權轉讓交易而停牌嘅堡獅龍（592），噚日復牌，話大股東賣盤仲傾緊，未有協議，但開市股價已經升咗三成，最高仲試過升四成六，收0.495元，升39.4%。
股價昨曾升46%
根據堡獅龍嘅通告講，持有68.58%控股權嘅羅家聖，同一名有意投資者傾緊出售控股權嘅事，不過有關條款都係傾緊嘅階段，雙方暫時未訂立任何協議。成份通告都冇提到底堡獅龍同邊個洽談緊、諗住賣幾多成股權、同涉及嘅金額等細節。不過俗語話「執輸行頭慘過敗家」，投資者已經飛撲落去先啦！
堡獅龍爆升，一眾成衣股跟住升，好似JOYCE（647）升咗近15%、佐丹奴（709）同I.T（999）都分別升12.1%同1.2%。唔通散戶以為佢哋又有賣盤概念？
堡獅龍創辦人大有來頭，由做製衣而打出名堂嘅「羅氏針織」羅定邦所創辦，係本港「四大針織家族」之一，旗下有Bossini。羅定邦有六個仔女，現任主席羅家聖就喺佢第五仔。不過家陣公司股價升咗咁多，賣盤成本即刻跟住升，唔知買家仲吼唔吼羅家聖嘅控股權呢？
李華華
mailto:[email protected]