一場金融海嘯衝擊全球各行各業，做出口生意嘅，就更加雪上加霜，好似震雄（057）咁，純利按年跌73%，真係慘不忍睹。雖然業績大倒退，不過主席蔣震（圖）同兩個仔女，就做咗一件值得讚揚嘅事，就係同公司一齊共度時艱！噚日震雄出咗09年度年報，集團內各執行董事都同意自動減薪，其中蔣震同第六女蔣麗苑，就分別減咗三成基本薪金，而孺仔蔣志堅同其餘兩個執董，亦都減薪兩成。
華華喺年報發現，原來有關減薪喺舊年12月已經開始生效。睇番截至舊年3月底嘅08年度，蔣震咗1054.3萬人工，計番09年度實收406.3萬，實際減幅高達61.5%；至於蔣麗苑減幅仲勁過阿爸，減成71.2%；而阿仔人工都較08年度減56.5%。
蔣震人工削六成
不過，佢哋都話今次自動減薪只係暫時性，等集團業務有好轉，同執董認為係時候嗰陣，就會作出調整。咁震雄今年就要做好啲業務，除咗同小股東交代之外，都要為自己荷包努力啲！