強國動漫《大嘴巴嘟嘟》近日熱爆高登討論區，網民推崇備至嘅原因，並唔係呢套號稱國產原創動漫嘅人物造型夠可愛，亦唔係情節夠曲折，而係嗰份陪伴香港新一代人成長嘅親切感。點解會有親切感呢又？原因係睇過《大嘴巴嘟嘟》嘅人，一定會不期然諗起日本動漫《蠟筆小新》。
52集大型國產動畫《大嘴巴嘟嘟》，喺中央電視台少兒頻道播放，號稱「一部真正關注現代兒童成長的原創精品」。動畫播咗一個月左右，開始引起內地網民熱論，話題係，點解套嘢咁熟口面，好似唔知喺邊度睇過咁嘅？動漫迷好快就搵到答案，原來《大嘴巴嘟嘟》好多情節同場景都抄足《蠟筆小新》。
要求央視停播
有內地網友睇完之後驚嘆：「見過抄襲的，但連分鏡頭都一樣的就沒見過了，連黑板上寫的東西都一樣！」網友仲發現，連插曲都抄襲日本動漫《熱帶雨林的爆笑生活》。網上有人要求央視停播，有人將片名改為《大嘴巴毒毒》。八方都好想香港有得播，讓港人見識吓呢套「精品」。