淫審處將表面不露點卻狂騷胸，而牙膏又滴落心口惹人想像嘅寫真集評為第一類讀物，令不少睇過嘅朋友都齊聲話匪夷所思。評級標準僵化，令意識大膽嘅無字圖書輕易過骨，應該係香港至會發生嘅荒謬現象。
在財經事件方面，國家開發銀行象徵式發行10億元2年期人民幣債券，票面年息2.45厘，講到明國家唔包底，亦無抵押品擔保，表面上已經好唔吸引，自揭「瘡疤」嘅目的，明顯係想趕客。咁細Lot嘢，淨係幾間本地保險公司都食得起有餘，唔需要勞師動眾啦，報紙全版廣告唔平㗎。以現時股市及新股之熾熱程度，相信畀多一個開嘅年息都未必有好多人吼啦！閂埋門搞掂更乾手淨腳。最頂癮係唔同配售銀行，竟然可以畀出唔同風險評級。
債券評級慣例上應該由發行人去攞，而且國開行身份特殊，屬國家機關，照道理應與國家評級一致，唔通本地銀行自己對評級機構已失去信心？
提高關卡免秋後算賬
渣打將之評為最高風險嘅F級，與之前評東亞人債無分別，星展畀次高風險，中銀香港評東亞嘅人債為中風險、國開行嘅為低風險，16間配售銀行銷售同一款產品，竟然搞出咁多唔同風險程度評級。
中銀與滙豐既係牽頭又係賬簿管理人，自然對產品較寬容，其他配售行畀出嘅評級，究竟係反映佢哋有幾緊張自己客戶嘅安危，抑或屬於自發性提高關卡，索性多一事不如少一事，可以賣少啲就做少啲，費事將來又有機會被秋後算賬，所以連阿爺都無面畀？
大家有無發覺，恒生銀行連續兩次都無參與人債銷售，但借孖展谷新股認購卻很積極，究其原因，肯定唔係唔想同阿媽爭生意，而係前者所牽涉行政與銷售人手及利潤空間唔係咁化算，新股得唔得好快知，可以話係單單清，易借易還風險低，長期貸款欠出路，短期貸款亦通殺，當銀行借出100億元孖展，年息2厘，凍資7日，利息回報就有超過380萬元，咁大間銀行，又點止可以借100個億呢！
打開門做生意，好多時就係風險與回報之取捨，邊瓣當造就做邊瓣，係被動地靈活，尤其金管局與證監會根本未在產品銷售程序上有共識，既然難為風險定分界，索性等個場平靜啲再謀定而後動亦未遲。
胡孟青