財經事務及庫務局局長陳家強（KC，圖）噚日又發「家書」，叫市民做個「精明投資者」，唔單止要識「格價」，仲要了解自己嘅真正權益同需要，兼且要對消費行為負責。
教市民投資前要做功課
咁點先可以醒少少呢，曾經喺05至07年間做過消委會主席嘅KC，話香港要同外國睇齊，將消費者投資權益放得更高，港府可以參考消委會經驗，教導投資者要先做功課，亦要明白投資回報同風險嘅比例係咪恰當，自己可唔可以承擔得到。
之不過，唔少投資產品都好複雜，KC就提議，引入消委會最權威嘅測試報告，以往只列明相機同埋冷氣機等消費品嘅功能異同評級制度，未來可以套用喺投資產品嗰度。佢又話，財務顧問一定要按消費者權益同需要提供意見，唔能夠從所屬機構嘅角度出發人買嘢，當局會考慮建立處理投訴同埋爭拗嘅機制，亦會同業界商量點搞，佢相信好快有成效。