我求大俠間唔中會聽到身邊有家室嘅朋友講，話俾屋企啲細路搞到周身唔得閒，想抽少少時間做自己嘢都唔得。噫？瑞士網球天王費達拿啱啱先生咗對孖女，真係驚佢因為忙於餵奶換片而影響表現，但係過來人嘅前網壇「1哥」森柏斯就一啲都唔擔心，仲話佢只會越嚟越勁。
女兒成爭標原動力
費達拿嘅太太米爾嘉喺上個禮拜四，幫佢生咗孖女莎蓮莉華同埋美娜露絲。費達拿佢雖然榮升爸爸，不過有唔少人擔心佢要幫手湊女，仲要係oneontwo，從而會影響場上嘅表現，再難加添大滿貫獎盃數目。
不過，現年37歲、本身有兩個仔嘅森柏斯就咁話：「我唔相信費達拿會喺凌晨4點幫佢兩個女換片囉。佢兩個小生命會改變佢嘅人生，但就係正面，而唔係負面嘅。我認為佢做咗爸爸之後，反而會更加專注自己嘅網球事業。」
森柏斯仲一副專家口脗咁話：「費達拿有佢太太同埋佢爸爸媽媽幫手湊，加埋可能仲有其他人幫手，根本就唔會煩到佢。」聽風之后李麗珊講，喺香港養大一個小朋友大約要400萬，養兩個就約莫要800萬，而瑞士的生活指數比香港高，斷估至少要1,000萬先要有得傾，因此費達拿喺生咗對孖女之後，反而要更加努力搵奶粉同埋尿片錢至真。撇開錢唔講，費達拿講過，要喺自己嘅細路面前捧盃，等佢哋知道自己爸爸有幾威同有幾勁，所以佢呢對孖女，對佢嚟講唔單止唔係負累，仲係佢爭取第16、第17甚至第18個大滿貫冠軍嘅原動力㖭。
孖女可贏大滿貫！？
話時話，正所謂「虎父冇犬子（女）」，費達拿打網球咁叻，佢對孖女莎蓮莉華同埋美娜露絲多多少少都會有啲佢嘅遺傳，所以博彩公司立博將佢哋其中一個贏大滿貫嘅賠率，定為26倍，至於拍住贏其中一項大滿貫女雙係51倍，而合作贏溫布頓女雙就係201倍。立博發言人韋恩保咁講：「對孖女只要遺傳到費達拿一半嘅網球天份，都肯定係天下無敵。」我求大俠就睇吓費達拿對孖女有冇爸爸咁叻。