每月例牌晚飯，輪到賓架Ｗ作東，佢揀咗近近哋嘅中國會。坐在大堂太嘈吵，因有歌手唱國語歌，一派舊上海模樣。外國人特別喜歡舊中國氣氛，大堂內滿是西方男女，中國會到了晚上就變成「鬼佬會」，生意非常好。我哋呢，就坐在房間內，坐得舒服，又有外面傳來之歌聲作背景音樂，已是一樂也。可惜嘅係，食物水平就難以推薦咯，適合鬼佬多啲！輪到左丁山作東之時，想話去新地方──沙田凱悅酒店，即大學站旁邊嗰間新酒店，此處有北京填鴨，鴨皮入口即融，試過嘅老友皆云美味。請賓架Ｗ基金Ｆ財務Ａ等等晚上去沙田，一啲都唔遠，經西隧與八號幹線，二十分鐘可達，分析Ｆ由國金二期機鐵站外出發，更加快捷。經濟博士Ｋ住在沙田銅鑼灣山，話八號幹線係為佢而設嘅，晚上在中環恒生銀行總行外坐的士，十三分鐘返到屋企，快過啲老友塞車返上半山區住宅！
財經飯局，自然談到金管局總裁人選，客人一致稱許陳德霖係最佳人選，只有傳媒Ｔ批評政府處理此事嘅程序與方法，話曾司長有權不用，引起泛民議員追擊。你話問金融界高層，有邊位最有資格做金管局總裁，幾乎個個都提名陳德霖。獵頭大師唐裕年可以列出一張三十九人名單，確實厲害，他日與馬田唐碰頭，要問吓佢去邊度搵到咁多名字至得，其中可能包括外國人或內地人啩？但無論邊一位係對手，一旦與陳德霖比較，計埋年齡與北京人脈關係等因素，都好難贏到陳德霖嘅啫。香港啲高級銀行家與知名經濟學家，我哋呢個飯局中人，全部認識，點會漏眼。
外國人又點？哈，飯局後，知道新加坡淡馬錫突然撤銷美國人CharlesWGoodyear於十月一日出任行政總裁之任命，現任總裁何晶繼續留任。嗱，呢位譯名顧之博嘅先生，有金漆CV，經何晶親自游說，先至應聘，點解突然未上任就解約？新加坡政府點會話畀你聽吖，一個主權基金聘請外國人做總裁，始終令新加坡政府唔舒服嘅。好彩新加坡政府唔係香港特區政府，公開招聘變為黑箱炒魷之後，唔會有新加坡傳媒批評！此舉是否影響新加坡之國際金融中心聲譽與地位？新加坡政府懶得理會。如果呢類事情在香港發生，立法會要特首落台咯！