從前！芒亨同PS系主機係一對，PSP版更係巔峯作，當時4條友圍埋劈龍嘅場面，麥記、港鐵隨處可見。上兩年《MonsterHunter3》宣佈預定平台係PS3，你以為從此就可以過住幸福快樂嘅打怪生活？轟隆！最後Capcom計過度過，見異思遷都係喺人氣最高嘅Wii登場，話咁快，今個星期六就出，收到風呢兩日會提早到貨㖭！我冇得揀，今個夏天惟有安坐家中斬盡冰火龍！
文：阿洛
水裏水裏去劈佢個水龍頭
今次芒亨利用Wii嘅，係人氣唔係體感玩法，所以除主機同綑版外，另一同綑版都包一個傳統控制器，都係㩒掣斬龍順手啲。新一集新龍唔少得，場景都好多，有需要帶備保暖裝備嘅冰天雪地，亦有烈火雄心嘅火山地帶，不過最期待都係今集有得潛水打龍。喺水底動作慢啲，但又可以直接游埋去劈佢個水龍頭，夏日炎炎我唔想帶埋個肚腩去沙灘，同幾個Friend對住部電視落水劈龍都應該好過癮，冇得女？打到悶揭吓啱啱買嗰本o靚模寫真咪得囉！
有機農莊面具仔幫拖
家用機正統續篇，終於都加入手提版嘅農莊，可以施肥種嘢，打完龍返嚟除咗食貓飯外，亦可以收成開啟更多隱藏嘢。而另外今集仲有一隻奇面族族人做你嘅「獵僮」跟出跟入，佢帶上唔同面具會有唔同能力，而且可以重點培育，仲會幫你煮番兩味。
單機分畫面組情侶檔
上網連線可以4人同行組隊，有咩好得過同朋友結伴齊齊打機吖。咁咪冇得出嚟面對面吹水？都得！上朋友屋企打囉！單機都有雙打模式，分割上下兩個畫面，如果有個鍾意打機嘅女朋友就仲啱，不如今晚上我屋企激戰連場吖，好好玩㗎！
同綑版會連一部黑版Wii、傳統手掣同Game，賣33,000日圓（約港幣$2,698）！
Profile
機種：Wii 類型：動作
人數：1-4人
推出日期：8月1日