天氣熱到爆炸，又經常落失魂雨，所以好多人攞車時，都順手喺停車場開水冲吓架車，洗車之餘又可幫愛驅降降溫，揸起上嚟唔會變蒸籠。但專家話洗車最忌「陽」「剛」，太陽同剛猛力道都係禁忌，唔單止要揀喺陰凉地方洗車，更要用陰力慢慢捽。
記者：徐影龍
攝影：楊錦文
Model：Alia@PureModels
陰凉忌猛烈陽光
夏天一到自然頻頻落雨，唔係傾盆大雨就係失驚無神過雲雨，搞到架車經常一笪笪，洗車行動自不然會頻密一點。一般文職人士，大概五六點收工，雖陽光已較柔和，但車內積聚咗一整日嘅熱氣，仍然熱得燙手，貿貿然落清潔劑洗車，分分鐘弄巧反拙。著名汽車護理專家NTI嘅Pat姐，就指出大部份人都會犯嘅毛病，就係喺烈日當空下洗車打蠟，「大熱天時洗車，唔好話洗嗰個辛苦，對架車亦都唔好，因為你一落清潔劑，轉個身攞水時，基本上已蒸發得八八九九，只會殘留當中嘅化學物喺表面，搞到一笪笪好肉酸。」咁最重要嘅清潔劑呢？「雖然好多人用著名嘅紅或藍清潔劑嚟洗車，但其實呢類產品為強鹼性，達到13、14度，對漆面有傷害，久而久之更令車身表面變黃，有可能打極蠟都暗啞無光澤。大家應該揀啲中性清潔劑，內含水蠟嘅二合一用品就更好，乾淨啲之餘令車身更光亮柔滑。」洗一次車就打埋「輕」蠟，名副其實慳水兼慳力。
陰力小心磨花焗漆
工欲善其事，必先利其器，抹車核心用品，咪再學的士佬咁，用勁甩毛頭嘅「祝君早安」毛巾，Pat姐教路，用一般軟熟海綿或粗毛巾都得，不過啲無塵布就最好。好似OG嘅出品就用1/500條頭髮咁幼嘅纖維嚟做，好柔軟，唔怕傷害到焗漆同擋風玻璃，連相機鏡頭、眼鏡都啱用，而且可重複清洗，用幾年都得。至於抹車無乜難度，但最緊要係手勢，用陰力慢慢抹，唔好見污迹就出力擦。反而最多人犯嘅毛病係疏忽，忽略咗頭泵把、氣壩位，甚至側鏡等，好多時都會唔記得抹，搞到清潔劑喺呢啲地方越積越多，一段時間後想救番就麻煩。
成架車最難搞係輪圈，咁用無塵布抹軨得唔得？「用柔軟嘅布當然好啲，不過輪圈上嘅迫力粉，因正負極關係，會緊緊咬實金屬物料，用死力係抹唔甩嘅，只會磨花條軨，更不應用強鹼度嘅洗軨水，否則令守胎軨變得無光澤或變色。我哋用呢隻洗軨水，可以將迫力粉扣緊住嘅正負極打散，噴完後迫力粉自動甩咗大半，再過水一抹即時立立令，完全不費力。」
氣壩係最多人抹漏嘅位，久而久之會有難清潔嘅厚迹。
無塵布纖維極幼細，配合陰力慢慢捽，唔會磨花車身，$24。
高溫水晶蠟抗猛烈陽光
想架車無咁易受陽光之害，不妨試吓NTI新推出嘅「OG高溫四重水晶蠟」服務，除幫你愛驅起完老泥，再省到立立令外，重有抗熱同抗UV作用，令到焗漆亮澤保持得更持久。
Pat姐（NTIDirector）
最好去陰凉地方，再等架車CoolDown咗先落清潔劑，家陣氣溫經常三十幾度，清潔劑眨吓眼就蒸發，化學物會一笪笪積喺車身，嘥心機。
查詢：NTI快速汽車護理（23452193）