敏妮認識唔少精於理財嘅朋友，不約而同話，如果有人問佢哋買樓定租樓好，佢哋會傾向租樓。奇怪嘅係，佢哋大部份自己都係業主，買咗樓！
敏妮最近睇到《華爾街日報》一篇專欄文章，可能解釋到呢個怪現象。文章以《HomeOwnershipWasNeverARoadToRiches》為題，作者因經常轉換工作地點，為咗屋企人住得安穩啲，所以買樓，寧願搬屋時賣咗佢。佢計算自己買樓賣樓嘅收入，係用賣價減買價同裝修加埋維修成本，91年至舊年夏天平均投資回報有3.5厘，但舊年夏天買嗰層就冇咁好回報。不過，佢覺得冇買錯樓，因為佢認為買樓最大價值唔係在於升值，而係在於能住，同時唔使畀本來必須要畀嘅租金，再者，供樓按變相逼佢儲蓄。
買樓當然最好有升值潛力，升值潛力要睇location，最好係豪宅。相反必需品最緊要啱心水，正如作者所講，當買樓係從自己嘅實際需要出發，你就會發現，超出實際需要嘅樓並唔係投資，而係浪費，就好似租間不必要嘅豪宅，你可以有咁嘅選擇，但喺財務上並不明智。
金隅都係早沽早着
同場加映：
前日講過金隅（2009）嘅追揸沽策略，千算萬算，敏妮後嚟發現算漏一項。上個禮拜有單新聞唔知大家有冇留意？話說國務院喺金融海嘯後，公佈咗十大振興產業規劃，當中包括水泥業。不過內地企業見好唔識收，搞到工信部狠批話佢哋盲目擴產，搞到產能過剩。大陸有報章引述發改委嘅消息話，可能會喺8月出招調控水泥產能。
金隅做乜？冇錯，北京最大水泥生產商！所以提醒抽到金隅嘅幸運兒，早沽早着，你可能為錯過高位揼心，敏妮亦曾錯過志高（449）首日高位，好彩後會有期，但唔係隻隻都咁好彩。
溫敏妮
http://wanmanli.com/blogs/