鄧麗欣（Stephy）近日推出新書《陪著你走》，點知因為本書有好多錯字，搞到佢升唔到呢之餘仲成為眾矢之的，變成A貨才女，唔怪得連亞視節目《香港亂噏》都要講Stephy啦，唔係就out晒！
噚日戚黛黛同劉錫賢返大埔亞視總台，為《香港亂噏》做好準備，當中戚黛黛扮「鄧麗音Stuphy」，劉錫賢就扮「倪康」，節目中倪康訪問Stuphy叫佢澄清番點解新書《賠到你走》會錯漏百出，Stuphy話：「你估我真係唔識字，我係專登咁做，一路睇書一路搵錯字不知幾好玩，有得睇又有得玩。」
仿周秀娜刷牙
倪康聽到即刻大讚鄧才女，佢話：「咁嘅橋都諗到，好過第二啲o靚模刷牙宣傳，刷得多流牙血。」對白抵死趣怪。至於秦啟維前幾集已經扮周秀娜刷牙滴晒牙膏嘅造型。
現場見戚黛黛嘅髮型同Stephy又真係好鬼似，根本唔使戴假髮，問佢事前有冇做定準備工夫？戚黛黛話：「我有上網睇Stephy嘅片段，發覺佢好鍾意講係咪囉，不過公司冇叫我扮佢唱歌走音。」
原來戚黛黛打字都係用國語拼音，佢話有時真係會揀錯同音字，佢又好同情Stephy，所以相信佢唔介意自己扮佢。