學生Ｙ去咗歐洲參加遊學團，漫遊五個國家，同時上課學習考試，睇嚟有料到，起碼眼界大開，得到西歐之政治文化嘅一手資料。學生出外，父母最希望佢哋日日打電話返香港報平安兼講吓所見所聞，但少年人出到外面，如甩繩馬騮，邊度有咁乖呀，所以父母不免心掛掛，Ｙ母尤其渴望知道乖仔嘅每日行程。
哈，原來年青人未必打電話回家，但就好好心機寫Blog，上Facebook。學生Ｙ嘅表姐就在Facebook上知道學生Ｙ之每日去向，記起就向Ｙ母報導吓。但Ｙ母冇乖仔密碼，上網睇唔到喎，惟有靠Ｙ表姐報料，知道乖仔已由威尼斯返回維也納上課。
我哋呢啲老餅，唔想知人哋嘅事，亦唔想在網上張揚自己私事，一於拒絕Facebook。呢日與馬主Ｎ吃午飯，聽到隔籬有位女士大聲講（其實家有好多餐廳座位太接近，太密，講說話容易俾人聽見）：「哎吔，姪女嘅朋友嘅朋友嘅朋友係我死黨個女，佢在Facebook睇到我位姪女與一位男仔在床上合照呀，好彩佢哋穿着整齊啫，阿哥睇到一定激死！」馬主Ｎ話Facebook有addfriends嘅功能，加加吓就好容易扯上天涯海角關係，俾屋企人撞見，故此冇乜秘密可言。馬主Ｎ話一位有資格做模特兒嘅靚女在著名教會女校畢業，平時家庭管教甚嚴，唔准出夜街，有一次在旺角偶然與父母失散咗，靚女居然要打電話搵父母求救，話唔識路落旺角地鐵站，你話幾純情呢；誰知靚女去年入咗本地大學，入住宿舍之後，立即性情大變，好少返屋企，最近靚女阿媽嘅朋友嘅朋友嘅朋友在Facebook發現靚女與男仔在旺角唱Ｋ，在長洲渡假屋之近似密照，阿媽知道後，幾乎驚惶失措。家啲年青人又係嘅，咁私隱嘅照片，擺上網做乜呀，想向成年人示威還是向明星歌星學習？馬主Ｎ亦在Facebook上睇到自己位公子（在澳洲讀中七）在澳洲和不同金髮女友攬抱嘅照片，惟有會心微笑，佢話：「阿仔乜都唔講畀我聽，但我有辦法喺Facebook追蹤得到佢！」阿爸見到自己個仔攬靚女就笑口騎騎，阿媽見到自己個女俾不同男仔攬住，就面紅耳熱想喊咁款，幾有趣也！