賭王何鴻燊與四姨太梁安琪所生的19歲長女何超盈，自小有同性密友、愛蒲愛玩，暴肥又激瘦。超盈昨日自爆與室內設計師男友Greg拍拖半年，已聽男友話戒蒲戒煙，更乖乖幫媽咪手看豪宅生意，修心養性，相信賭王都飲得杯落。
將環保袋變熊公仔的法國環保袋Perigot昨日在金鐘舉行發佈會，吸引了賭王四房長女何超盈（Sabrina）、林建岳女友陳浥萍（Monica）、琦琦等捧場。由英國返港的Sabrina與14歲弟弟何猷君一同出席，她透露仍未決定大學修讀fineart還是businesslaw。
已見家長
早前Sabrina有一批和同學夜蒲煲煙飲酒的相片曝光，她指相片攝於去年12月，問Sabrina是否經常煲煙？她即時解釋，兼訓示在旁的弟弟說：「細佬你都聽住，其實我支氣管炎係唔食得煙，我都係唔食煙，啲朋友個個都會拎住支煙扮食，以前覺得好型，家覺得好儍。」她指媽咪見到相片曝光都感不快。
不過Sabrina強調自己戒夜蒲蘭桂坊及沒有食煙，她說：「因為男朋友唔畀，係呀，我聽話。」她更大方透露男友背景，男友Greg是香港人，比她年長，修讀室內設計，兩人在英國經朋友介紹認識，稍後會回港工作，已拍拖半年，並見過家長，她更高度評價男友值100分。
銀行學習
Sabrina拍拖大個女，似乎修心養性，她說：「家喺澳門幫媽咪做暑期工，喺凱旋門（澳門豪宅）睇則，8月開始，我會喺香港德國銀行返暑期工。」她又踢爆家姐超雲也叫她介紹男仔，Sabrina說：「佢太高要求喇，我就冇咁高，不過我男友質素都好好。」
此外，琦琦今日會趁暑假帶女兒去北京，會合任達華逛故宮及攀長城等，林建岳女友Monica則會同囡囡去夏威夷。
採訪：LawWaiMan
攝影：WongWaiHung
