世上有很多爸爸，每年親子大旅行，都將去年行程copyandpaste一次，像我阿爸。記得小學三年班，我已去了東京迪士尼3次，終於忍不住向爸爸大呻：「年年都係咁，悶死人咩！」怪就怪20年前，未有互聯網。今年暑假，東京「o靚場」湧現，舊o靚場亦紛紛僭建，打造了一張親子遊新地圖。各位爸爸，舊年張行程drag過去資源回收桶吧，09激新親子遊提案，我度好畀你了。
記者、攝影：劉嘉蕙
鳴謝：JTB、日本國家旅遊局（JNTO）、TokyoDomeCorporation、東京迪士尼渡假區
四日三夜親子遊提案
Day1
台場日：台場合眾國，1:1高達
Day2
樂園日：TokyoDome/東京迪士尼/富士急樂園
Day3
花火＋Shopping
Day4
市郊Outlet日
Day1 電視嘉年華趁墟
也許你還在跟同事討論幾時過台場睇高達，在遠方的台場，日本人的注意力，早已投到隔籬的台場合眾國去了，連雜誌社都嗱嗱臨整本《台場Walker》應市，可想而知台場今年有幾熱鬧。
開在富士電視台隔籬草地的台場合眾國，簡單來說，是一年一度的電視嘉年華，更具體的說，想像TVB將經典遊戲節目倒晒出嚟與眾同樂，同一片草地上，三點位置有《係咪小兒科》玩問答、5點位置有《大咕窿》、8點位置出現《獎門人》的大閘和壽司枱、10點位置有《美女廚房》味之天使……嘅紙板俾大家影相，加埋「吳唱K」唱K助興，就是這樣的一回事。
人氣Top6
No1 豬
大家排晒長龍，就是為了睇小豬幸子。
No2 踩屎
經我一日觀察，人，原來真係好鍾意踩屎。
No3 夾壽司
超人氣壽司節目，鬥快夾壽司，師傅好識搞氣氛。
No4 直線單騎
「千里走單騎」，完成直線者為勝。
No5 小兒科
兒童問答節目，能夠參與，是我小學時的夢想哦。
No6 跨欄
最基本的遊戲，永遠都最能吸引人玩。
排隊睇豬遇着屎
睇完以上陣容，你可能好擔心個嘉年華無嘢好玩，幸好，世上不是所有電視台都「事事旦旦」，我在會場走了一圈，就深深感到富士電視台節目如何多元化以及充滿趣味，亦佩服日本仔將電視節目包裝成家庭遊戲的創意和心思。例如嘉年華特設牧場區，讓都市人感受牧場之樂，有一塊假番薯田俾人掘薯仔，又擺了隻紅豬「幸子」讓人影相朝聖。但我認為最絕處，乃是整幾嚿屎俾人踩，把主題呼應得何其完美哦！
另外，想呼籲「事旦台」，不要抄人哋嘉年華條橋過香港，要搞，都唔好是但喺電視城隔籬片草地搞，將軍澳工業邨近日真係好臭。
台場合眾國
日期：即日至8月31日
地址：港區台場富士電視台側
入場費：成人$123，中小學生$106
網址： http://www.odaiba.com
交通：Yurikamome線台場站步行1分鐘
Day2 樂園日
在東京，通常會預一天玩樂園，3大樂園今年夏天都有新搞作，各有賣點，一定要開家庭會議傾傾去邊個好。
迪士尼玩濕
不是手指拗出唔拗入，數亞洲區迪士尼樂園，東京版着實比較抵撐，尤其炎炎夏日，就係多你一個迪士尼海洋，有得濕有得凉。
迪士尼海洋今年暑期重頭節目「奇奇帝帝消暑大行動」，一眾卡通人物跳上噴水船同遊客鬥噴，現場水花四濺；淋到一身濕。玩完又可等到夜晚參加阿拉伯海岸營火之舞，舞走身上脂肪！
另一邊廂的迪士尼樂園，今年夏日之星是怪獸公司，若你還未坐4月新開嘅「怪獸公司：迷藏巡遊車」，唔緊要，今次可一次過玩埋夏夜特別派對「怪獸公司俱樂部：酷酷笑一夏」。
提醒各位，暑假期間（即日至8月31日）夜間煙火「空中迪士尼魔法」會暫停。
東京迪士尼渡假區
地址：千葉縣浦安市舞濱
網址： http://www.tokyodisneyresort.co.jp/index_ch.html
交通：JR京葉線或武藏野線舞濱站南口下車
富士急玩Fing
某日click入敝報《娛樂開Chat》，o靚模Kama話上次去日本無去FujiQ，大為揼心。真係儍妹，事關富士急樂園上星期才推出新機動遊戲「鐵骨番長」，假如一早去咗，咪一樣無得玩。鐵骨番長有59米高，睇相得一棟塔，望多兩眼才見到塔頂有12個幼幼的鞦韆，最高時速每小時51公里，旋轉時直徑最大28米，嘩，我淨係打呢行字，已經驚到手震。
富士急樂園
地址：山梨縣富士吉田市新西原5丁目6-１
網址： http://www.fujiq.jp
交通：新宿站西口坐巴士直達
TokyoDome玩鬼
東京巨蛋TokyoDome，今年夏天推出「戀活遊園地」，幫o靚界男女尋找另一半，令我等超晒齡中女飲恨不已。不過，你阿爸阿媽一定同你講「中學生不應談戀愛」，轉頭建議你玩同樣新鮮登場嘅「血之妖面屋敷」。即係乜？恐怖屋幾時會話你知入面有乜嘢啫！
TokyoDome
地址：東京都文京區後樂園1-3-61
網址： http://www.tokyo-dome.co.jp/
交通：地下鐵丸之內線或南北線 後樂園駅出口
下周日本東京
有雷雨，24-28℃
