自從當上本港銀行第一位女CEO（行政總裁）後，恒生（011）副董事長兼行政總裁梁高美懿一直不忘藉着寫Blog勉勵一下同事。適逢暑假，梁太喺Blog同其他同事分享自己嘅旅遊體驗，實行以大班身份帶領員工「workhard，playhard」。
教下屬玩都要有計劃
芸芸旅遊地點之中，梁太始終情有獨鍾澳洲，點解？因為當年梁太曾經喺澳洲工作，囡囡亦喺澳洲成長，當年一到假期，老公就會飛去澳洲探梁太與囡囡，留下好多回憶，就連今年初由滙豐轉職恒生之前，梁太都特登到澳洲叉叉電先投入新職務。
梁太喺Blog度勉勵恒生嘅同事，平日工作已經夠忙，適當時候都要紓緩吓緊張嘅心情，旅遊就係其中一個鬆弛好方法，喺工作之餘，都要好好策劃一下自己嘅旅遊大計，單係諗吓已經係一件樂事。講吓講吓，就連梁太都已經渴望下次假期喇！