周不時都收到促銷電話，問你「係咪9XXX-XXXX嘅機主？」然後問你等唔等錢使、想唔想做纖體代言人，或者有個好抵嘅長途電話優惠想介紹畀你之類。一般情況下，除非對方煩得好緊要，否則八方都會好聲好氣咁拒絕對方，因為明白家搵食艱難。但最近有啲中大畢業嘅朋友收到一個電話之後，就好嘮嘈。
打電話畀校友募捐
話說唔少中大校友，早排都收到自稱係師弟（或師妹）嘅來電，話係學生大使，參加咗劉遵義校長發起嘅「校友關懷捐貲計劃」，想師兄師姐分享吓舊日校園點滴，同埋了解吓師兄師姐嘅近況呀咁，但講吓講吓就入正題，話想師兄師姐回饋母校，捐番啲錢畀中大，可以每月過數，月捐幾舊水都得。
有啲校友睇得《警訊》多，心諗係咪警方成日講嗰啲電話騙案呢？於是開始反盤對方，問問吓先開始相信，原來打電話嚟嘅確係中大學生，以時薪50蚊受聘於中大拓展及籌募處，工作係打電話畀校友募捐。啲校友先醒起，之前收過劉遵義署名嘅信，好似就係講呢個計劃。但有校友話，一見係劉遵義個名，冇乜點睇封信就掉咗落垃圾桶。
八方睇番中大網頁嘅介紹，呢個叫「Phone中關懷」嘅活動，原來係以隨機方式抽出校友，獲選中嘅校友會收到師弟妹嘅問候電話，同佢哋分享吓校園生活，同母校嘅最新發展，然後仲會向校友宣揚大學嘅「募捐文化」。至於校友嘅捐款，多少不拘，都用喺學生發展項目上，好似獎助學金、學生交換計劃、學生設施呀咁。
不過，有啲校友就唔係好接受呢種手法，覺得用錢請學生打電話畀校友，用溫情嚟包裝，其實都係想要錢，有啲硬銷兼市儈。佢哋感嘆，家啲大學為咗搵錢，真係無所不用其極。
中大方面就同八方講，07/08學年大學同書院頒發咗8,600幾萬元獎助學金同經濟援助，比上年度大幅增加2,000幾萬，其中交換生計劃嘅獎學金亦達到450萬，可見需求幾咁龐大。由於政府冇額外撥款，所以好靠校友同各界人士支持。發言人仲話，今年有四成幾成功聯絡到嘅校友，已經答應捐錢畀母校，籌得近300萬港元。
mailto:[email protected]