黃貫中（Paul）和黃家強孭飛的演唱會前晚在紅館舉行最後一場，朱茵和家強老婆再度撐場，Paul與家強公開多謝愛侶及大講「ILoveYou」。不過提到批評棒棒堂咪嘴被炸blog，Paul雖然自嘲鵪鶉，但臨尾也不忘爆了一句：「3年後仲喺度先同我講。」
一連三場《ThisIsRock&RollLiveInHongKong》，前晚在紅館舉行最後一場，黃貫中（Paul）和黃家強繼續瞓身演出，當晚不少圈中好友捧場包括梁漢文夫婦、周國賢、黃偉文、谷德昭及張達明等。日前有消息指陳奕迅（Eason）和徐濠縈婚姻亮紅燈，但當晚阿徐卻帶同康堤捧擔任嘉賓的Eason場，以行動闢謠。
齊謝愛侶冧爆
甫開場大部份觀眾已衝到台前，情緒高漲，而朱茵和家強老婆也走到台前吶喊，不過工作人員即時上前勸喻各人返回座位。雖然家強老婆有通行證，但工作人員認不出她，故此一樣冇面畀照趕，不過朱茵卻未有被趕繼續睇騷。當Paul和家強多謝眾人時，fans大叫朱茵，Paul笑說：「係啦，多謝Athenia（朱的洋名）。」家強則以英文說：「Iwanttothankyoutomywife，Iloveyou。」
當晚太極和Eason任嘉賓，眾人合唱《真的愛你》及生日歌祝Eason昨日生日。安哥時Paul和家強為觀眾求情讓他們企出來看騷，Paul叫觀眾和平及溫柔，否則他們要坐監。早前Paul因批評棒棒堂咪嘴而被炸blog，慶功時問到家強是否唱《醒你》為Paul出氣，家強說：「我唔覺佢有錯，唔通撐糖咩？我係講糖，唔係講堂，唔好對號入座。」Paul則扮懵說：「我鵪鶉收咗皮。」但臨尾都忍不住再出言贈興說：「3年後仲喺度先同我講，我唔怕，都俾人插慣。」
Eason否認婚變
Eason經理人陳家瑛對Eason傳婚變昨日在電話回覆說：「Eason同老婆不知幾好，老婆唔喺身邊，佢哋日日通電話，點解係都要屈佢同謝安琪有嘢！」Eason日前在廣州演唱會上嚎哭，被指情緒崩潰，陳家瑛則說：「佢感動台下歌迷嘅熱情啫，今日係佢生日，公司同事都會為佢慶祝生日。」
採訪：李珮洳、林妃
攝影：陳志嵐、葉君海
