正生書院遷址梅窩阻力重重，不過師生就獲得社會認同。辦教育展嘅立新國際名下教育基金，噚日公佈頒「成就獎」畀正生校長陳兆焯，以嘉許佢十幾年嚟有教無類。呢個獎係表揚逆境自強或對社會有貢獻人士，基金主席容蔡美碧話，個獎每兩年先頒一次，原本明年先再頒，但今次被陳校長感動，破例一次。
正生兩名學生及聖公會莫壽增會督中學學生葉倩盈都獲得基金頒「才德躍進獎」。用任天堂「孖寶兄弟」概念設計自家帽嘅中三生鄭金鈴都得到呢個獎；佢一個月前收到任天堂律師信話佢侵權，已經停賣剩底嘅80幾頂帽，出身單親家庭、領取綜援嘅佢因此蝕咗近2,000蚊。