民建聯03年區選大敗後發奮圖強，最重要係有阿爺撐住，黨務蒸蒸日上，連政府都要搵佢哋嘅人做副局長兼政治助理，難怪呢幾年忽然愛國入黨嘅飛來蜢特別多，唔少人都爭相攬住民建聯嘅招牌，希望扶搖直上。
黨內元老現身爆慘況
唔知係咪眼見呢班新丁背景唔夠專唔夠紅，愛國愛港味道唔夠濃，擔心佢哋上到位都代表唔到民建聯，所以黨中央最新搞搞新意思，決定為黨內一班新星搞一系列有關民建聯血淚史嘅培訓講座，第一場8月1日晚舉行，講者據講係黨內元老，旨在向班新仔灌輸民建聯嘅歷史知識，等佢哋唔會「名不正、言不順」，被人問起民建聯發展都口啞啞。
據聞呢個培訓講座仲有一個戰略目的，就係透過黨內元老現身說法，講吓民建聯回歸前嘅慘況，提醒班新仔一切得來不易，咪以為民建聯盤古初開就咁巴閉，自己坐享其成就得得戚戚。
有幸獲邀上堂嘅只包括新中委、副發言人以及青年民建聯成員。據聞當中唔少人對民建聯認識幾乎零，必須惡補；下一步要學嘅，可能係中共血淚史都未定。