大姨媽我好耐都未揸過棍波車，事關近年新車就算係超跑高性能款式都好，已經有自動波款，可以唔使吊極力子吊到腳軟，自動波自不然成首選。Anyway，都唔否認棍仔始終比自動波車好玩兼更主導，嗰日就突然心血來潮拉老公轉部棍仔跑車過吓癮。香港路面多彎多斜又短又多燈，仲要人多車又多，可以話要求高度駕駛技巧兼注意力，揸棍仔，對腳協調性不足就隨時死火，如果咁啱停正燈口、十字路口死火就真係羞家。
自問棍仔最難係過彎，識用Heel&Toe技巧就最掂。放極力子同時又要Keep住個Brake，再用腳趾快速輕力踩、放油門，夠轉數至快腳踩極力子轉波，好幾個步驟要一口氣完成入彎至夠滑唔會扽吓扽吓，有效轉低波同時減速，入彎順，安全性亦大大提升，老公都讚我手車順。姊妹們想好似我手車咁好又有老公讚就要畀時間操吓喇，呢個世界無先天叻人，後天付出同努力係好重要㗎！
文：大姨媽