每季英超開鑼前會有場由英超冠軍對足總盃冠軍嘅社區盾作為熱身，而南華足主羅傑承，同傑志總領隊伍健宣佈，下月17日（周一）晚喺大球場首辦香港慈善盾，為兩隊波的合作伙伴紅十字會同基督教聯合醫院籌款，目標可以籌100萬港元善款。
南華同傑志兩隊高層原先計劃踢場表演賽為籌組中嘅港職聯搵銀，點知港職聯今季未能「上馬」，但又唔想浪費呢個構思，決定搞場由聯賽冠軍對亞軍嘅香港慈善盾，如果效果理想希望一直搞落去，回饋社會。
雖然話慈善賽，但波飛只收80蚊、60蚊同30蚊（長者及學生票），希望收平啲，吸引多啲球迷入場；同埋靠贊助、捐款同賣獎券籌善款，希望達到籌100萬港元嘅目標。
羅生：慈善盾留番畀傑志
為增加賽事刺激性，勝出一隊可以攞6成善款送畀嘅慈善機構，輸波嗰隊只得4成，而我求大俠仲聽到羅生話，南華今季重金招兵買馬，除要攞亞協盃，仲要做本地4冠王；至於呢個新搞嘅慈善盾留番畀傑志攞，等佢唔使冇盃落袋，伍健則話，為慈善唔使咁禮讓，總之佢班西班牙同本地球員實砌到盡，希望贏波幫聯合醫院籌多啲善款，資助佢哋購買醫治嚴重面部胎記病童嘅激光機。