我求大俠噚日下晝睇見樸茨茅夫同意將高治賣去熱刺嘅消息後，第一時間諗到轉會成事嘅話，呢個高佬會隨隊訪港，喺嚟緊禮拜日鬥南華。一問之下，南華足主羅傑承即時回應話「高治來港成事機會好高」。羅生鍾意搞飯局請客，即管睇佢到時會唔會請高治食番餐，又或者攞叠新書《南華飯堂》，送「書」（輸）畀敵方呢？
勢投熱刺或趕及訪港
據報樸茅已同意熱刺嘅1,000萬鎊（約1.28億港元）開價，今日就會完成交易，簽約5年，而羅生似乎一早掌握晒高治去向，話今日會打去熱刺嗰邊，落實呢個英格蘭國腳前鋒會來港。佢同時又講到三治會缺兩治，高治多數嚟，但活基治、京治因傷嚟唔到。整定香港球迷食唔到呢份三明「治」囉。
點都好，南熱場波門票銷情相當理想，據講已大概賣出14,500張。如果加埋呢個人氣同佢6呎7吋高度一樣咁高嘅射手壓陣，叫座力不在話下。28歲嘅高治兩年前曾隨利物浦訪港，佢不嬲新聞多多，當年入波後跳機械舞夠晒出位，而佢周不時做出車身窩利、倒掛等等繁複嘅射門動作。另外，佢啱啱先向個超索模特兒女友艾比（AbbeyClancy）求婚成功，你話假如佢帶埋未來靚嫂訪港，又或者對南華時入波跳番part機械舞，到時我哋唔登頭條至奇。
哈利列納攬實愛將唔放
熱刺領隊哈利列納以前教修咸頓、樸茅都重用高治，家陣又撬高治過檔，簡直當正對方係自己honey咁攬實唔放。不過，所謂有入有出，熱刺引入高治後，可能將戴倫賓特賣去新特蘭，另外又會將贊拿斯賣去阿士東維拉，嚟緊變動怕且唔會小。